O‘zbekiston olimlari uchun xalqaro ta’lim resurslariga yo‘l ochildi

dfc57fcb-bfb5-6b25-a9e9-17722c40910d

2018 yilning 23 mart kuni “Hyatt Regency Tashkent” mehmonxonasida O‘zbekiston Respublikasi Oliy va o‘rta maxsus ta’lim vazirligi hamda Niderlandiyaning “Elsevier” kompaniyasi bilan hamkorlikda “SCOPUS” va “ScienceDirect” xalqaro ilmiy ma’lumotlar bazalari mahsulotlari uchun Milliy bitimni tantanali imzolash marosimi bo‘lib o‘tdi.

Tadbirda O‘zbekiston Respublikasi Oliy va o‘rta maxsus ta’lim vaziri I.Madjidov, “Elsevier” xalqaro kompaniyasi vitse-prezidenti Feliks Xayest va kompaniyaning Markaziy Osiyo va Ozarbayjon bo‘yicha mintaqaviy direktori Aliya Ospanova, O‘zbekiston Respublikasi Innovatsion rivojlanish vazirligi, O‘zbekiston Fanlar akademiyasi, Jahon banki mutasaddilari, Toshkent shahridagi oliy ta’lim muassasalari rektorlari hamda ommaviy axborot vositalari vakillari ishtirok etdilar. O‘zbekiston Respublikasi Prezidentining 2017 yil 22 martdagi “Xalqaro Rivojlantirish Assotsiatsiyasi ishtirokidagi oliy ta’lim muassasalari moddiy-texnika bazasini mustahkamlash loyihasini amalga oshirish chora-tadbirlari to‘g‘risida”gi PQ-2848-sonli Qarori ijrosini ta’minlash maqsadida O‘zbekiston Respublikasi Oliy va o‘rta maxsus ta’lim vazirligi Niderlandiyaning “Elsevier” kompaniyasi bilan hamkorlikda “Ilm-fan – 2020” milliy rivojlanish Dasturini ishlab chiqdi. “Ilm-fan – 2020” milliy rivojlanish Dasturidan ko‘zlangan asosiy maqsad mamlakatimizda ilmiy salohiyatni, oliy ta’lim muassasalari professor-o‘qituvchilarining ilmiy-tadqiqot faoliyati samaradorligini oshirish, jahon ta’lim resurslari, zamonaviy ilmiy adabiyotlarning elektron kataloglari va ma’lumotlar bazalariga kirish imkoniyatlarini yaratishdan iborat.“Elsevier” kompaniyasi “Ilm-fan – 2020” milliy rivojlanish Dasturida mamlakatimiz ilmiy markazlari va oliy ta’lim muassasalari, shuningdek, olimlarning dunyo ilmiy reytingidagi o‘rnini ko‘tarish, respublika ilmiy jurnallarini “SCOPUS” va “ScienceDirect” xalqaro ilmiy ma’lumotlar bazasi tizimiga kiritish, yosh olim va doktorantlarga ilmiy maqolalar tayyorlash va ularni yuqori impakt-faktorga ega bo‘lgan ilmiy nashrlarda chop etishlariga ko‘maklashishni ko‘zda tutgan.Ma’lumot uchun:“Elzevir” (Elsevier) – fan, ta’lim va tibbiyot sohasida innovatsion yechimlarni va mahsulotlarni taklif etadigan jahondagi eng yirik nashriyotlardan biri hisoblanadi. Kompaniyaning vakolatxonalari Amsterdam, London, Nyu-York shaharlarida joylashgan bo‘lib, dunyo bo‘ylab 70ga yaqin ofislari bor. Nashriyot Reed Elsevier media-xoldingning bir qismi bo‘lib, jahonning eng yirik 500 kompaniyalari ro‘yxatiga kiradi. 2500dan ortiq jurnallar, 20000ga yaqin kitob va ma’lumotnomalarni chop etadi.

Manba: O‘zbеkistоn Rеspublikаsi Оliy vа o‘rtа mахsus tа’lim vаzirligi